藝術節目

Clockenflap 節目向來豐富多元，除了世界級音樂表演外，藝術節目亦是另一焦點，互動藝術裝置、打卡熱點遍佈場地不同角落。

Anne Cubberly’s Giant Puppets （星期六和星期日於場內遊走，詳見上方時間表）

出身於民風自由開放嘅美國佛州，自小矢志成為藝術家嘅 Anne Cubberly 喺中學時期踏入當地著名嘅 Bread and Puppet 劇院，首次遇上令佢心醉半生嘅巨型人偶，日後更成立行內有名嘅「Anne Cubberly's Giant Puppets」工作室。ACGP 多年來為不同巡遊、節慶、藝術活動以至音樂演出訂製多具形狀天馬行空，色彩斑斕著到靚一靚嘅扯線公仔，今次特別將其中兩隻超大型貓貓”Pinto Bean”及”Lima Bean”帶嚟 Clockenflap 四圍行，大家現場見到記得同佢哋say個hi啊～

Alchemy Décor (裝置藝術)

2016年於西澳珀斯由 Asher Gunzburg 創辦，製作公司 Alchemy Decor 擅以各種材料，喺世界各地搭建出令人相當新奇嘅大小帳篷，形狀千奇百怪，可以話係藝術品等級嘅實用設施，今年佢哋將會為 Clockenflap 砌起一個15米大嘅高帳，適合各位觀眾入去打卡抖抖。

Heart to Heart （星期五、六、日於場內遊走，詳見上方時間表）

我哋今年藝術公開招募嘅獲選企劃，由少女藝術家 Heart White 提案，名為「Heart to Heart」嘅心心相印告解室。00後嘅白小姐（唔係白姐姐）將會喺音樂節場內建造一個移動密室，歡迎各位觀眾進入私密空間與 Heart 盡訴心中情，無論係情緒健康、自我疑惑、生活壓力，通通趁喺fest玩到心都開哂時，一次過放低say bye bye。

Relentless Melt No. 30 (整個音樂節期間在 Harbourflap 與 Orbit 舞台螢幕上播放)

由 Clockenflap 藝術總監 Jay Hofmann-Forster 加上影像人 Max Hattler 共同炮製，名為「Relentless Melt No. 30」嘅概念作品，觀眾們將可以一覽由海量抽象及迷幻聲畫片段構成嘅無限溶解，採用作品既有 Hattler 合作開嘅 Johnathan Gillie 同 Robert Seidel，亦有新銳本地藝家 Huang Xiaowen 與 Wyatt Lau Tsun Wai 等等。

(RE)HABITATION by Videotage (整個音樂節期間在 Harbourflap 與 Orbit 舞台螢幕上播放)

由香港著名非牟利影視藝術機構 Videotage 呈獻，今次以重現維多利亞時期為主題，加入與現場觀眾互動元素，實時將人群嘅畫面與百年前嘅地貌交疊，構成一幅穿越時空嘅流動影像，蔚為奇觀。

King Plum’s Sound Emporium x Om Peace (裝置藝術，星期六及日，詳見上方時間表）

由周遊列國，曾與多位不同療法大師修行嘅 Ambikha Devil 將會喺我哋五米高嘅充氣舞台，舉行為期兩日嘅課程，內容包括西藏音療碗及鑼聲頻沐、呼吸調息、聲音療法、無聲的士高式入神舞、薩滿鼓拍....... 等等不同日常比較少接觸到嘅另類音樂體驗。